Cebu – Kumpiskado ng kapulisan ng Mandaue City ang tinatayang nasa 20 gramo ng pinaghihinalaang shabu na umaabot ang halaga sa Php136,000 sa buy-bust operation sa Purok Tambis, Brgy. Umapad, Mandaue City, noong Martes, Agosto 20, 2023.
Sa pangunguna ni Police Major Erwin Abrasado, Station Commander ng Police Station 5, Mandaue City Police Office, matagumpay na napasakamay ang subject ng operasyon na kinilalang si “Jomar”, 36, residente ng F. Mina St. Brgy. Mabolo, Cebu City.
Nahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
Patuloy naman ang kapulisan ng lungsod sa pagpapahusay at pagpapaigting ng kampanya kontra ilegal na droga para sa pagkakalutas ng mga problema na dulot nito sa mamamayan at komunidad.
