Capiz – Arestado ang itinuturing na Top 1 Most Wanted Person sa Western Visayas kasunod ng inilunsad na paghahain ng Warrant of Arrest ng Capiz PNP sa Barangay Alayunan, Maayon, Capiz nito lamang ika-19 ng Agosto 2023.
Bandang alas-1:06 ng hapon ng isagawa ang nasabing operasyon ng pinagsanib na mga tauhan ng Maayon Municipal Police Station (Lead Unit) kasama ang Capiz Police Provincial Trackers Team, PIT Capiz, RIU6, Capiz PIU, 602nd Company RMFB6, 606th Company, RMFB6, 1st Capiz PMFC, at Capiz Highway Patrol Team.
Kinilala ni Police Major Syril Punzalan, Officer-In-Charge ng Maayon MPS, ang suspek na si alyas “Jerecho”, 21, isang laborer, at residente ng nabanggit na barangay.
Matagumpay na naaresto ang akusado sa bisa ng Warrant of Arrest para sa kasong Qualified Rape na walang inirekomendang piyansa para sa pansamantalang paglaya.
Samantala, pinasalamatan at pinuri ng PRO6 Regional Director na si PBGen Sidney Villaflor ang mga operatiba sa matagumpay na pagkakahuli ng nasabing wanted person.
“Nagpapasalamat po tayo sa mga masisigasig at dedikado nating mga operatiba dahil sa pagkakadakip ng ating Top 1 Regional Most Wanted Person, sana ay ipagpatuloy po natin ang ating magandang layunin. Sa atin pong mga mamamayan, tulong-tulong po tayo sa pagtugis sa mga may pananagutan sa batas, para sa mas ligtas at tahimik na rehiyon,” ani PBGen Villaflor.
