General Santos City – Arestado ang isang lalaking tumangay ng aabot sa 70 sako ng feeds sa Damalerio Compound, Purok Saydala, Barangay Tambler, General Santos City nito lamang Lunes, Agosto 14, 2023.
Kinilala ni Police Major Ian Bagot, Station Commander ng General Santos City Police Office-Police Station 5, ang nahuling suspek na si alyas “Arjay”, 26, walang asawa, driver, kasalukuyang naninirahan sa Barangay Sinawal, General Santos City at residente ng Banga, South Cotabato.
Ayon kay PMaj Bagot, dakong alas 4:17 ng umaga nang nakatanggap ng reklamo ang kanilang hanay tungkol sa ginagawang pagnanakaw ng mga suspek sa naturang lugar.
Agad namang nirespondehan ng pulisya ang insidente at rito na nahuli ang suspek.
Narekober mula sa kanya ang tinangay na isang yunit ng Isuzu Drop side truck/elf na kargado ng 70 sako ng Trigo Feeds na may tinatayang halaga na Php210,000.
Sa ngayon ay nasa kustodiya na ng GSCPO-PS5 ang nahuling suspek habang ang narekober na sasakyan at mga sako ng feeds ay itu-turn over sa kinilalang biktima na si James Congson Damalerio, 57, na residente ng Barangay Bula, General Santos City.
Samantala, patuloy pa ring pinaghahanap ng otoridad ang nakatakas na kasamahan ng nahuling suspek.
Panulat ni Patrolman Khnerwin Jay A Medelin
