Iloilo City – Higit sa Php300,000 na halaga ng shabu ang nasabat sa tatlong drug suspek sa ikinasang buy-bust operation ng Regional Police Drug Enforcement Unit 6 at Iloilo City Police Station 3 sa Sto. Kurucan, Brgy. Simon Ledesma, Jaro, Iloilo City bandang alas-1:15 ng umaga nitong ika-12 ng Agosto 2023.
Kabilang sa mga naaresto ang dalawang High Value Individual na sina alyas “Kayla”, 29, residente sa Rizal Estanzuela, City Proper, Iloilo City; Ritche, 31, residente ng Brgy. Simon Ledesma, Jaro, Iloilo City; at ang isang Street Level Individual na si Jan June, 39, na residente ng Brgy. Quintin Salas, Jaro, Iloilo City.
Ayon kay Police Captain Glenn Soliman ng RPDEU 6, agad na inaresto ang mga supek matapos ang pagsabwatan ng mga ito sa pagbebenta ng isang pakete na naglalaman ng pinaniniwalaang shabu sa nagpanggap na poseur-buyer kapalit sa halagang Php12,000.
Ayon pa kay PCpt Soliman, nakuha rin sa posesyon ng tatlo ang 15 piraso ng heat-sealed transparent plastic sachets na naglalaman ng suspected shabu, at ilang mga non-drug items.
Lahat ng narekober na droga ay tumitimbang ng 55 gramo at may Standard Drug Price na Php374,000.
Ang tatlong suspek ay mahaharap sa kasong paglabag sa RA 9165 o ang Comprehensive Dangerous Drugs Act of 2002.
Patuloy na hinihimok ni PBGen Sidney Villaflor, PRO 6 Regional Director ang mamamayan ng Western Visayas na patuloy na suportahan ang kapulisan sa sama-samang paglaban kontra ilegal na droga para sa pagkamit ng payapa at maayos na lipunan.
