Maguindanao del Norte – Nagsagawa ng panunumpa at Turn-Over Ceremony sa 102 kwalipikadong dating miyembro ng MILF at MNLF bilang bagong kasapi ng Philippine National Police Patrolmen/Patrolwomen Quota para sa taong 2023 sa PRO BAR Grandstand, Camp BGen Salipada K Pendatun, Parang, Maguindanao del Norte nito lamang ika-10 ng Agosto 2023.
Ang naturang seremonya ay pinangunahan ni Police Brigadier General Allan Nobleza, Regional Director ng PRO BAR, katuwang sina Police Lieutenant General Rhodel Sermonia, The Deputy Chief PNP for Administration, at Atty. Benjamin Abalos, Jr., Secretary of the Interior and Local Government/ Chairperson, National Police Commission.
Mula sa 1,249 na kandidato na inendorso ng gobyerno ng Bangsamoro na isa sa mga pangunahing kinakailangan para sa kanilang pagpasok, 102 kandidato ang nakapasa sa proseso ng recruitment na binubuo ng Body Mass Index, Physical Agility Test, Neuro-Psychological Examination, General Physical at Dental Examination, at Drug Test. Ito ay upang matukoy ang kanilang pisikal at mental na kalusugan sa kanilang pagpasok sa organisasyon.
Ang 102 na matagumpay na kandidato ay binubuo ng 52 miyembro mula sa Moro Islamic Liberation Front at 50 miyembro mula sa Moro National Liberation Front kung saan ay dadaan ang mga ito sa anim na buwang pagsasanay upang hubugin ang kanilang katawan at kaisipan na maging isang huwarang tagapagpatupad ng batas sa hinaharap.
Panulat ni Patrolman Charlie Nasroden Corpuz
