Navotas City — Arestado ang isang binatilyo matapos mahulihan ng tinatayang Php353,600 halaga ng shabu sa isinagawang buy-bust operation ng Navotas City Police Station nito lamang Martes, ika-8 ng Agosto 2023.
Pinangalanan ni PBGen Rizalito Gaaps, District Director ng Northern Police District, ang suspek na si Aldrian, 21, binata, walang trabaho, at residente ng Danny Bangus St., Brgy. Tangos North, Navotas City.
Naganap ang nasabing operasyon ng Station Drug Enforcement Unit ng Navotas CPS, dakong 11:20 ng gabi sa kahabaan ng M. Naval St., Brgy. Sipac Almacen, Navotas City na nagresulta sa pagkakadakip ng binatilyo.
Nasamsam sa kanya ng mga awtoridad ang walong (8) pirasong heat-sealed transparent plastic sachet na hinihinalang shabu na may timbang na 52.0 gramo at nagkakahalaga ng Php353,600; isang tunay na Php1,000 na may kasamang labing-isang (11) piraso ng Php1,000 boodle money na ginagamit bilang buy bust money; at isang (1) coin purse.
Mahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
Tiniyak naman ni PBGen Gapas na kanilang ipagpapatuloy ang pinaigting at pinalakas na kampanya kontra ilegal na droga maging sa lahat ng uri ng kriminalidad para sa maayos, maunlad at ligtas na pamayanan.
Source: NPD PIO
Panulat ni PSSg Remelin M Gargantos
