South Cotabato – Tiklo ang pitong kalalakihan dahil sa pagnanakaw ng pinya matapos silang mahuli ng security guard ng DOLE Philippines sa Crossing 2, Barangay Reyes, Banga, South Cotabato nito lamang Martes, Agosto 8, 2023.
Nakilala ang pitong suspek na sina Alyas “Aliamer”, 33; “Umbra”, 22; “Saidamin”, 23; “Muktar”, 19; “Pahat”, 24; “Muhammiden”, 22; at si alyas “Faisal”, 45, kapwa residente ng Maguindanao Province.
Ayon sa ulat ng Banga Municipal Police Station, nahuli ng roving guard ng DOLE Philippines ang pito sa aktong pagnanakaw ng pinya na kung saan ikinarga ng mga ito sa kani-kanilang dalang motorsiko ang 1,133 piraso ng pinya na MG3 Variety.
Umaabot naman sa Php49,852 halaga ng mga pinya ang nakulimbat ng mga suspek.
Samantala, narekober rin sa mga suspek ang pitong yunit ng motorsiklo na may nakakabit ng basket na kanilang ginamit sa naturang pagnanakaw.
Sa ngayon ay kasalukuyang nakakulong ang mga suspek habang inihahanda ang kaukulang kaso na isasampa laban sa kanila.
Panulat ni Patrolman Khnerwin Jay A Medelin
