Cebu – Bunga ng walang humpay at agresibo na kampanya kontra ilegal na droga ng kapulisan ng Central Visayas, nasabat ang tinatayang nasa halos Php7 milyong halaga ng ilegal na droga sa buy-bust operation na inilunsad sa Sitio Purok Nangka, Brgy. Cabancalan, Mandaue City, Cebu noong Hulyo 29, 2023.
Dakong alas-9:20 ng gabi noong Sabado, inilunsad ng mga operatiba ng Police Station 4, Mandaue City Police Office ang operasyon kung saan ang High Value Target ay tagumpay na nadakip.
Sa isang pahayag, binigyang kilanlan ni Police Brigadier General Anthony Aberin, Regional Director ng Police Regional Office 7, ang naarestong suspek na si alyas “Talyo”, 40, residente ng nasabing lugar.
Nakumpiska sa pag-iingat ni “Talyo” ang nasa 1,000 gramo ng shabu na tinatayang nagkakahalaga ng Php6,800,000.
Mga kaukulang reklamo sa paglabag sa RA 9165, Comprehensive Dangerous Drugs Act of 2002 ang isasampa laban sa suspek.
Kaugnay dito, pinuri ni Police Brigadier General Aberin ang mga operatiba sa likod ng matagumpay operasyon, maging ang mahusay na pamamaraan upang bigyang wakas ang problema sa droga.
