Cebu – Labis ang tuwa at galak ng nasa 200 magsasaka at mangingisda ng Medellin, Cebu na mga naging pangunahing benepisyaryo ng community program ng National Police Commission (NAPOLCOM) at Police Regional Office (PRO) 7 na inilunsad sa Medellin Sport Complex noong Hulyo 28, 2023.
Sa paglulunsad ng proyektong “Halad sa mga Mag-uuma ug Mananagat”, tumanggap ang mga benepisyaryo ng programa ng mga serbisyong hatid ng grupo katuwang ang mga stakeholders at iba pang ahensya ng pamahalaan.
Kabilang sa mga natanggap na serbisyo ng mga manggagawang benepisyaryo ng proyekto ay ang libreng medical check-up, legal assistance, financial literacy lectures, police clearance, at ang pamamahagi ng food packs.
Ang makabuluhang aktibidad ay bahagi ng ika-28th Police Community Relations Month Celebration na may temang: “Serbisyong Nagkakaisa tungo sa Maunlad at Ligtas na Pamayanan.”
Sa isang pahayag, muling ipinaabot ni Police Brigadier General Anthony Aberin, Regional Director ng PRO 7, ang kanyang pasasalamat sa lokal na pamahalan ng Medellin, at sa mga stakeholders at ahensya ng gobyerno na katuwang nito sa paghahatid ng maayos, tunay, at tapat na serbisyo publiko.
Kabahagi sa matagumpay na programa ang mga tauhan at kinatawan mula sa tanggapan ng PRO 7, NAPOLCOM, National Support Units, Landbank Bogo City at Cebu North Lending Center, Integrated Bar of the Philippines, SSS, PESO, BPATs, Faith-based leaders, at mga miyembro ng KKDAT.
