Cebu City – Bilang bahagi ng patuloy na pagpapaigting ng kapulisan sa kahandaan sa mga kalamidad, aktibong nakiisa ang Police Regional Office (PRO) 7 sa Simultaneous Grand Launching ng PNP Help and Food Bank sa PRO7 Parade Ground, Camp Sergio Osmeña, Sr., Cebu City, noong Hulyo 22, 2023.
Ang aktibidad ay sabay-sabay na inilunsad sa buong rehiyon, katuwang ang Local Government Units, Non-Government Organizations, at mga stakeholders, na naglalayong makapagpaabot ng suporta sa lahat ng police-community outreach programs, kabilang na ang barangayanihan community outreach programs, humanitarian assistance sa panahon ng bagyo, at iba pang mga kalamidad.
Ang PRO7 Help and Food Bank ay naghahangad na matugunan ang mga alalahanin sa kakulangan ng pagkain, tubig, damit at gamot sa pamamagitan ng pagpapanatili ng nakahanda na suplay ng mga pagkain at kagamitan na maaaring ilabas at agad na maipamahagi sa mamamayan sa panahon ng mga naturang krisis o mga biglaang pangangailangan.
Ang gawaing ito ay binuo alinsunod sa patnubay ng Hepe ng Pambansang Pulisya na si Police General Benjamin C Acorda Jr, upang palakasin ang “Community Engagement” na isa sa kanyang 5-Focused Agenda tungo sa pagkamit ng mas mapayapa, ligtas at progresibong lipunan, gayundin sa Able, Active and Allied o ang Triple A na program thrust ni Police Brigadier General Anthony A Aberin, Regional Director ng PRO 7.
“We are taking proactive steps in ensuring that whenever the need arises, PRO 7 will always be ready to extend help to the community in furtherance of our objective of having an ABLE, ACTIVE and ALLIED police force,” ani Police Brigadier General Aberin.
Pinuri at ipinaabot din ng PRO 7 Regional Director ang kanyang pasasalamat sa walang patid na suporta ng mga stakeholders at partner agencies nito sa pagtulong sa komunidad.
Source: PIO PRO 7
