Cebu City – Walang kawala ang tatlong lalaking suspek sa drug-bust operation ng Police Station 7 ng Cebu City Police Office makaraang makumpiskahan ng nasa halos Php700,000 halaga ng ilegal na droga sa Sitio Upper Suran, Brgy. Kinasang-an, Cebu City noong Martes, Hulyo 11, 2023.
Kinilala ni Police Colonel Ireneo Dalogdog, City Director ng Cebu City Police Office, ang mga naaresto na si “Jessie”, 28, ng Brgy. Basak Pardo; “Alejandro”, 25, ng Brgy. Basak San Nicolas; at “Ryan”, 18, residente ng Brgy. Talamban ng naturang lungsod.
Inilunsad ng pulisya ang operasyon pasado alas-2 ng madaling araw at nakuha mula sa mga suspek ang tinatayang nasa 100.30 gramo ng hinihinalang shabu na may Standard Drug Price na Php682,040.
Bago ang operasyon, ilang araw na binantayan ang mga suspek matapos makatanggap ng report ukol sa ilegal na aktibidad.
Mahaharap ang mga naaresto sa mga reklamong paglabag sa RA 9165 o Comprehensive Dangerous Drugs Act of 2002.
Tiniyak ng Cebu City PNP ang mas mahusay at pinaigting na pagsasakatuparan ng kampanya kontra ilegal na droga at sa lahat ng uri ng kriminalidad para sa kaayusan ng komunidad.
