Baguio City – Tinatayang nasa Php374,000 halaga ng shabu ang nakumpiska sa isinagawang buy-bust operation ng mga awtoridad sa Burnham-Legarda, Baguio City, nito lamang Hulyo 11, 2023.
Ayon kay Police Colonel Francisco Bulwayan Jr., City Director ng Baguio City Police Office, ang nahuling dalawang suspek ay tinaguriang mga High Value Individual (HVI) dahil sa pagsisikap ng pinagsamang tauhan ng Regional Police Drug Enforcement Unit/Regional Intelligence Division, Baguio City Police Office Station 7 at 10, City Drug Enforcement Unit, Regional Intelligence Unit 14 at PDEG SOU-14.
Nakuha mula sa mga suspek ang 11 pakete ng hinihinalang shabu na may bigat na humigit kumulang 55 gramo na may street market value na Php374,000 at iba pang non-drug evidence.
Mahaharap sa kasong paglabag sa Republic Act 9165 o Comprehensive Dangerous Drugs Act of 2002 ang mga nasabing suspek.
Pinuri naman ni PBGen David K Peredo Jr. ang matagumpay na operasyon ng Cordillera PNP na nagresulta sa kabawasan ng paglaganap ng ilegal na droga sa naturang rehiyon.
