Davao City – Tinatayang nasa Php2,060,000 halaga ng shabu ang nakumpiska sa isang High Value Individual sa isinagawang buy-bust operation ng PNP sa Dacudao Avenue Brgy. Governor Paciano Bangoy, Davao City, noong Hunyo 23, 2023.
Kinilala ni Police Major Antonio Luy, Station Commander ng Bajada Police Station, ang suspek na si alyas “Kap”, 18, residente ng Sarphil Agdao Brgy. San Antonio, Davao City at tinaguriang Top 1 High Value Individual sa City level.
Ayon kay PMaj Luy, naaresto ang suspek sa isinagawang buy-bust operation ng pinagsamang tauhan ng Bajada PS at Davao City Police Office – City Intelligence Unit.
Dagdag pa ni PMaj Luy, nakuha mula sa suspek ang ilang pakete ng hinihinalang shabu na may bigat na humigit kumulang 103 gramo na may street market value na Php2,060,000 at ang marked money na ginamit sa operasyon.
Mahaharap sa kasong paglabag sa Republic Act 9165 o Comprehensive Dangerous Drugs Act of 2002 ang nasabing suspek.
Ang matagumpay na pagkakadakip sa suspek ay malaking kabawasan sa paglaganap ng ilegal na droga sa Rehiyon Onse. Patuloy ang Police Regional Office 11 sa paghuli sa mga drug personality sa pamumuno ni PBGen Alden Delvo, PRO11 Regional Director.
Panulat ni Patrolman Alfred Vergara
