Samar – Nasakote ng mga awtoridad ang isang Barangay Kagawad sa ikinasang buy-bust operation sa Brgy. Buray, Paranas, Samar nitong ika-23 ng Hunyo 2023.
Kinilala ni Police Lieutenant Colonel Aquilino Pongcol III, Officer-In-Charge ng PDEU-SPPO ang tinaguriang High Value Individual na si alyas “Bungal”, 54 at residente ng Paranas, Samar.
Naging matagumpay ang operasyon sa pinagsanib na pwersa ng mga operatiba ng Philippine Drug Enforcement Agency Samar (Lead Unit), PNP Drug Enforcement Unit-Samar Police Provincial Office at Paranas Municipal Police Station-Station Drug Enforcement Team.
Nakumpiska mula sa suspek ang tatlong pirasong plastic sachet na naglalaman ng pinaghihinalaang shabu na tumitimbang ng humigit kumulang 2 gramo at may estimated market value na Php15,000.
Mahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
Ang walang humpay na operasyon laban sa ilegal na droga ay isang manipestasyon na seryoso ang kapulisan sa adbokasiya nito sa pagbabawas ng suplay at paghuli sa mga gumagamit ng ipinagbabawal na gamot.
