Iloilo – Kusang sumuko ang 5 miyembro ng Communist Terrorist Group sa mga tauhan ng Regional Mobile Force Company 6 sa 606th Company Headquarters Calinog, Iloilo nito lamang ika-21 ng Hunyo 2023.
Ang boluntaryong pagsuko ng limang CTGs ay bunga ng walang tigil na negosasyon at pagsisikap ng mga tauhan ng 606th Company, RMFB 6 sa pangunguna ni Police Major Romwill Miras, Company Commander, sa pamamagitan ng patuloy na KASIMBAYANAN program sa naturang barangay.
Ayon kay PMaj Miras, ang mga sumukong CTG members ay pawang mga residente ng Brgy. Binolusan sa bayan ng Calinog, Iloilo.
Kasabay din ng kanilang pagsuko ang pagbaba ng kanilang armas na tatlong (3) long barrel 12-gauge home-made shotgun; isang (1) short barrel 12-gauge; isang (1) caliber .38 na walang serial number; at apat (4) na 12-gauge ammunition.
Matatandaan noong nakaraang linggo na nagpahayag ng pagbawi ng suporta sa komunistang teroristang grupo ang aabot sa 102 na residente ng Brgy. Binolusan na pinangunahan din ni Police Colonel Joel Garcia, Force Commander ng RMFB 6.
Sa ngayon ay sumasailalim na ang mga sumuko sa validation at profiling para sa Enhance Comprehensive Local and Integration Program o E-CLIP.
Ang Police Regional Office 6 sa ilalim ng pamumuno ni PBGen Sidney N Villaflor, ay patuloy na hinihikayat ang iba pang miyembro ng makakaliwang komumistang teroristang grupo na magbalik-loob na sa ating gobyerno upang mawakasan na ang walang kabuluhang pakikibaka at makinabang sa iba’t ibang programa ng ating pamahalaan na makakatulong sa pamumuhay ng maunlad at tahimik kasama ang mga mahal sa buhay.
