Naga City – Huli ang isang Barangay Tanod sa tangka nitong pagpupuslit ng ilegal na droga sa isinagawang Standard Operating Procedure ng mga personahe ng Police Station 3, Naga City Police Office matapos itong dumalaw sa mga pinsan nitong Person Under PNP Custody (PUPC) sa nasabing istasyon nito lamang Hunyo 18, 2023.
Kinilala ni Police Colonel Nelson Pacalso, City Director ng Naga City Police Office, ang suspek na si Henjie C. Tesorero, 46, binata at residente ng Barangay Peñafrancia, Naga City.
Ayon kay PCol Pacalso, bandang 2:50 ng hapon ng dumalaw ang suspek sa dalawa nitong pinsan na nakakulong sa nasabing istasyon at nang ininspeksyon ang dala nitong gamit ay nadiskubre ang kontrabando na pinaniniwalaang shabu.
Narekober mula dito ang apat na piraso ng heat-sealed transparent plastic sachet ng hinihinalang shabu na may tinatayang timbang na 27 na gramo at street value na Php183,600.
Mahaharap ang suspek sa kasong paglabag sa RA 9165 o ang Comprehensive Dangerous Drugs Act of 2002.
Ang Naga City PNP ay patuloy ang pagsasagawa ng mga hakbang upang mahuli ang mga taong may kaugnayan sa ilegal na droga na sumisira sa buhay ng mga taong nabibiktima nito.
Source: Naga City Police Office
