Davao City – Arestado ang isang babae sa isinagawang buy-bust operation ng Bajada PNP sa Brgy. Paciano Bangoy, Davao City, noong Hunyo 16, 2023.
Kinilala ni Police Major Antonio Luy, Station Commander ng Bajada Police Station, ang suspek na si alyas “Mareng”, 47, residente ng Sasa, Davao City na tinaguriang Top 1 High Value Individual sa City level.
Ayon kay PMaj Luy, naaresto ang suspek matapos mahuli sa akto ng pagbebenta ng hinihinalang shabu sa isinagawang buy-bust operation ng pinagsamang tauhan ng Bajada PS at City Intelligence Unit katuwang ang PDEA XI.
Dagdag pa ni PMaj Luy, nakuha mula sa suspek ang ilang pakete ng hinihinalang shabu na may bigat na humigit kumulang na 10 gramo at may street market value na Php70,000 kasama ang marked money na ginamit sa operasyon.
Mahaharap sa kasong paglabag sa Republic Act 9165 o Comprehensive Dangerous Drugs Act of 2002 ang nasabing suspek.
Pinuri naman ni PBGen Alden Delvo, PRO11 Regional Director ang pagkakadakip sa drug suspect at nangako na ipagpapatuloy ang laban kontra ilegal na droga sa Rehiyon Onse.
Panulat ni Patrolman Alfred Vergara
