Cebu City – Kumpiskado ang tinatayang nasa Php680,000 halaga ng ilegal na droga sa buy-bust operation na inilunsad ng mga operatiba ng Police Station 3, Cebu City Police Office sa Lapu-Lapu St., Brgy. San Roque, Cebu City noong ika-9 ng Hunyo 2023.
Kalaboso naman sa operasyon ang drug suspek na kinilalang si “Mitchel”, 20, residente ng P. Burgos St., Brgy. Santo Niño, Cebu City.
Ayon kay Police Major Efren Dela Cruz Diaz Jr, Station 3 Commander, dakong alas-2:50 ng madaling araw noong Biyernes ng inilunsad ng Station Drug Enforcement Team ang operasyon matapos ang kompirmasyon ukol sa pagkakasangkot ng suspek sa ilegal na aktibidad.
Nakumpiska mula rito ang nasa 100 gramo ng hinihinalang shabu na may Standard Drug Price na Php680,000.
Mahaharap ang suspek sa kasong paglabag sa mga reklamong may kaugnayan sa ilegal na droga.
Ang matagumpay na operasyon ay patunay sa dedikasyon at walang humpay na pagbibigay katuparan ng kapulisan sa kampanya kontra ilegal na droga.
