Iloilo City – Timbog ang isang High Value Individual sa buy-bust operation ng pulisya at nakumpiska mula rito ang tinatayang Php408,000 halaga ng droga sa Brgy. Bo. Obrero, Lapuz, Iloilo City, bandang alas-7:30 ng gabi, ika-7 ng Hunyo 2023.
Kinilala ni Police Colonel Joeresty Coronica, City Director ng Iloilo City Police Office, ang subject person na si Jomare Porras alyas “Joe”, 32, single, walang trabaho at residente ng nabanggit na barangay.
Ang nasabing operasyon ay inilunsad ng pinagsamang pwersa ng Iloilo City Drug Enforcement Unit at Station Drug Enforcement Team ng Lapaz PNP.
Narekober sa naturang drug-bust ang isang silyadong pakete na naglalaman ng suspected shabu na ginamit bilang buy-bust item, limang pirasong pakete na naglalaman ng suspected shabu, Php10,000 na buy-bust money, isang unit ng homemade Caliber.38 na may apat na bala, isang unit na cellular phone, at isang sling bag.
Ang drogang nakumpiska ay may kabuuang timbang na 60 gramo na may tinatayang halaga na Php408,000.
Ang naarestong drug suspek ay nakakulong na sa himpilan ng Lapaz PNP at mahaharap sa kasong paglabag sa Republic Act 9165 o Comprehensive Dangerous Drugs Act of 2002.
Ang matagumpay na operasyon kontra ilegal na droga ay isang patunay na ang Iloilo City PNP ay hindi napapagod para sugpuin ang ilegal na droga sa syudad upang mapanatili ang isang maayos at maunlad na pamayanan.
