Bataan – Matagumpay na iginawad ng Morong PNP ang isang munting bahay para kay Lola Oyang na ginanap sa Brgy. Mabayo, Morong, Bataan nito lamang Sabado, ika-26 ng Mayo 2023.
Ang naturang proyekto ay pinamunuan ni Police Captain Ernesto Clemente, Chief of Police ng Morong Police Station, katuwang ang Subic Bay Airport Police Station, Barangay Officials, at Pastora Jane Olid.
Nasira ang tirahan ni Lola Oyang dulot ng hagupit ng bagyo noong nakaraang taon kaya naman napili na maging benepisyaryo ang naturang lola at nagsagawa ng munting seremonya para sa paggawad ng bahay at ipinagpanalangin ni Pastora Olid ang kaligtasan at kalusugan ni Lola Oyang.
Nagbigay din ang mga awtoridad ng ilang mga gamit sa bahay at food packs bilang panimula sa kanyang pagtira sa kanyang munting bahay.
Labis ang pasasalamat ni Lola Oyang sa mga tumulong sa kanya lalo na ang Morong PNP sa hatid na malasakit at tulong na ibinigay sa kanya.
Samantala, ang “Bahay ni Lola Project” ay kaugnay sa Serbisyong Nagkakaisa ng ating Ama ng Pambansang Pulisya na si Police General Benjamin Acorda Jr.
Layunin nito ang makapagbigay ng serbisyo sa mga lubos na nangangailangan ng tulong at mapagtibay ang ugnayan ng PNP at mamamayan.
Source: Morong Municipal Police Station
Panulat ni Police Corporal Jeselle Rivera/RPCADU3
