Negros Oriental – Nakumpiska sa 31-taong gulang na ginang sa Negros Oriental ang nasa 20 gramo ng shabu na may tinatayang halaga na Php136,000 sa anti-illegal drug operation ng Provincial Intelligence Unit at Provincial Drug Enforcement Unit, Negros Oriental Police Provincial Office noong Martes, Mayo 23, 2023.
Kinilala ni Police Captain Jonah Acal, Chief PDEU ng NOPPO, ang nadakip na suspek na si “Ann-Ann”, residente ng Brgy. Calindagan, Dumaguete City.
Ayon kay Police Captain Acal, inilunsad ng mga operatiba ang operasyon dakong alas-7:50 ng gabi sa Brgy. Boloc-boloc, Sibulan, Negros Oriental kung saan agad na naaresto ang suspek matapos mapagbentahan ng droga ang nagpanggap na poseur buyer.
Nahaharap sa reklamong paglabag sa Sec. 5 at 11, Art. II ng RA 9165 o Comprehensive Dangerous Drugs Act 2002 ang suspek.
Siniguro ng mga operatiba sa likod ng matagumpay na operasyon na kanila pa lalong pagbubutihin at pag-iigtingin ang hakbangin upang tugunan at lutasin ang problema sa ilegal na droga maging ang mga kriminalidad na dulot nito.
