Sorsogon – Arestado ang isang lalaki na nakatala bilang Top 4 Regional Most Wanted Person ng Bikol sa inilunsad na Manhunt Operation ng pinagsamang operatiba ng PNP Bikol sa Barangay Panlayaan, West District, Sorsogon City, Sorsogon nito lamang Mayo 17, 2023.
Kinilala ni Police Brigadier General Westrimundo Obinque, Regional Director ng PRO5, ang akusado na si Rodolfo Lato Hamor, 50, binata, residente ng Purok 1, Barangay Panlayaan, West District, Sorsogon City, Sorsogon.
Ayon pa kay PBGen Obinque, naaresto ang akusado bandang 12:35 ng tanghali sa nasabing lugar ng pinagsanib na mga operatiba ng Sorsogon City Police Station- Sorsogon PPO at Regional Intelligence Unit 5 sa bisa ng Warrant of Arrest para sa kasong 5 Counts of Rape na walang inirekomendang piyansa.
Ang PNP Bikol ay patuloy sa paghuli ng mga taong may pananagutan sa batas upang mabigyan ng karampatang hustisya ang mga taong nabiktima nito at pinapaalalahanan din ang publiko na makiisa sa mga programa ng kapulisan para sa isang tahimik at ligtas na komunidad.
