Cebu City – Kumpiskado ang tinatayang nasa Php1.7 milyong halaga ng ilegal na droga kasunod ng matagumpay na buy-bust operation na inilunsad ng City Intelligence at Drug Enforcement Unit ng Cebu City Police Office sa Conception St., Brgy. Suba, Cebu City noong Biyernes, Mayo 12, 2023.
Ayon sa City Director, CCPO, Police Colonel Ireneo Dalogdog, pasado alas-10 ng gabi nang isagawa ng mga operatiba ang operasyon laban sa target na si “Noel”, 46, residente ng Sitio Lawis, Brgy. Pasil, Cebu City.
Mabilis naman na nadakip ang suspek matapos makatransaksyon at makabili ng droga ang pulis na nagpanggap na poseur buyer.
Umaabot sa 250 gramo ng hinihinalang shabu ang narekober mula sa suspek na may Standard Drug Price na Php1,700,000.
Mahaharap sa patung-patong na reklamo kaugnay sa ilegal na droga ang naarestong suspek
Patuloy naman ang buong kapulisan ng Cebu City sa pagpapahusay ng kanilang mga paraan tungo sa katagumpayan ng kampanya nito kontra ilegal na droga at sa lahat ng uri ng kriminalidad.
