Iloilo – Nakumpiska sa isang lalaki ang baril at droga sa ikinasang joint buy-bust operation ng awtoridad sa Brgy. Tapacon Bingawan, Iloilo noong Martes, alas-2:40 ng hapon, ika-9 ng Mayo 2023.
Kinilala ni Police Lieutenant Ryan Christ Inot, Officer-In-Charge ng Bingawan Municipal Police Station, ang suspek na si Peter Escanda, 39, may asawa, isang habal-habal driver at residente ng Brgy. Tambal, Janiuay, Iloilo.
Ang buy-bust operation ay isinagawa ng pinagsanib na pwersa ng Bingawan MPS, Provincial Drug Enforcement Unit ng IPPO at Coast Guard Intelligence Group, Western Visayas.
Nakuha mula sa suspek ang 8 gramo ng shabu na may halagang Php54,400, isang homemade 9mm revolver, limang 9mm ammunition, buy-bust money at non-drug items.
Nahaharap ang suspek sa kasong paglabag sa Republic Act 9165 (Comprehensive Dangerous Drugs Act of 2002) at RA 10591 (Comprehensive Firearms and Ammunition Regulation Act).
Pinuri naman ni Police Colonel Ronald Palomo, Provincial Director ng IPPO, ang mga Ilonggo Cops sa matagumpay na operasyon at hinikayat ang mamamayang Ilonggo na patuloy na suportahan ang BIDA program ng ating pamahalaan upang matugunan at mapigilan ang paglaganap ng ilegal na droga.
