Naga City – Tinatayang Php1,360,000 halaga ng shabu ang nakumpiska sa dalawang suspek sa ikinasang buy-bust operation (High Impact Operation) ng PNP-PDEA sa Zone 7, Dapdap St., Sitio San Rafael, Barangay Cararayan, Naga City nito lamang Mayo 1, 2023.
Kinilala ni Police Colonel Nelson Pacalso, City Director ng Naga City Police Office, ang mga suspek na sina Marivic B. Cabral, 38, biyuda at si Jason DG. Belleza, 24, binata at parehong mga residente ng nabanggit na lugar.
Ayon kay PCol Pacalso, bandang 8:00 ng gabi nang maaresto ang mga suspek ng pinagsanib na mga operatiba ng Regional Police Drug Enforcement Unit 5 (ODRDO-RPDEU5 Team Cam. Sur/ Naga City), Naga City Police Station 6 – NCPO at CDEU – NCPO sa pakikipag-ugnayan sa PDEA RO5.
Naaresto ang mga suspek matapos makabili sa mga ito ng isang piraso ng heat-sealed transparent plastic sachet na naglalaman ng hinihinalang shabu na may tinatayang timbang na 50 na gramo kapalit ng Php150,000.
Sa isinagawang body search, narekober pa sa mga ito ang isang (1) piraso ng knot-tied plastic sachet ng hinihinala din na shabu na may timbang na 150 na gramo.
Sa kabuuan, nasa 200 na gramo ng shabu ang nakumpiska na may tinatayang halaga na Php1,360,000.
Mahaharap ang mga suspek sa kasong paglabag sa RA 9165 o “Comprehensive Dangerous Drugs Act of 2002.
Ang PNP Bicol katuwang ang pamayanan ay patuloy na magkakaisa upang masugpo ang ganitong klase ng krimen para malinis ang komunidad sa pagkakaroon ng ilegal na droga na sumisira sa buhay ng mamamayang Pilipino.
Source: Naga City Police Office
