Northern Samar – Boluntaryong sumuko ang isang sugatang miyembro ng Communist Terrorist Group sa mga awtoridad sa Brgy. Trangue, Catarman, Northern Samar, nito lamang Linggo, Abril 30, 2023.
Kinilala ni Police Major Norman Kiat-ong Jr., Officer-In-Charge ng 1st Northern Samar Provincial Mobile Force Company, ang sumuko na si alyas “CJ/Kurati”, 29, isang PSR listed at Medical Officer sa ilalim ni alyas Bambam, SRGU SRC Emporium.
Ayon kay Police Major Kiat-ong Jr, bandang 12:30 ng hapon ng makatanggap sila ng tawag mula kay Margie L Cardenas, Chairwoman ng Brgy. Trangue, Catarman, Northern Samar na may sugatang CTG sa kanilang Barangay Hall at gustong sumuko sa Gobyerno.
Ayon pa kay PMaj Kiat-ong Jr, nagawa ng nasabing sugatang CTG na makatakas sa nangyaring bakbakan na naganap sa pagitan ng mga pwersa ng militar at CTGs bandang 2:00 ng madaling araw sa paligid ng Brgy. Himaraganan at Brgy. Santander, Bobon, Northern Samar.
Agad namang pinuntahan ng mga tauhan ng 1st Northern Samar PMFC Tracker Team, Catarman MPS at 43rd IB, PA at dinala sa Northern Samar Provincial Hospital ang nasabing CTG na nagtamo ng mga sugat sa iba’t ibang bahagi ng katawan.
Mensahe ni PMaj Kiat-ong Jr, “Ang PNP ay laging handang magpaabot ng tulong sa mga nais talikuran ang armadong pakikibaka at magbalik-loob sa pamahalaan”.
“Habang nagpapatuloy ang AFP-PNP sa kanilang pagsisikap na mapanatili ang kapayapaan at seguridad sa bansa, hinihimok namin ang iba pang miyembro ng CTG na lumalaban pa rin sa gobyerno, na tularan itong CTG na indibidwal na sumuko at ilatag ang kanilang mga armas. Sa pamamagitan ng mga programang reconciliation at reintegration ng gobyerno ay handang magbigay ng tulong para sakanilang pagbabalik,” dagdag pa niya.
