Iloilo – Arestado ang number 1 Drug Personality sa Pavia Iloilo matapos ang isinagawang paghahain ng Search Warrant na inilunsad ng Pavia Municipal Police Station kasama ang Provincial Drug Enforcement ng IPPO sa Purok 4, Brgy. Cabugao Norte, Pavia, Iloilo nito lamang alas-6:45 ng umaga ng ika-24 ng Abril 2023.
Kinilala ni Police Major Dadje Delima, Hepe ng Pavia MPS, ang suspek na si alyas “Toto Neil”, 36, High Value Individual, at residente ng nabanggit na lugar.
Ayon kay PMaj Delima, hinalughog ng mga kapulisan ang bahay ng naturang suspek at narekober ang sampung pakete ng pinaniniwalaang shabu, may bigat na 58 gramo na may tinatayang halaga na Php400,000, mga drug paraphernalia, isang fragmentation hand grenade, at isang homemade pistolized 12-gauge shotgun.
Samantala, pinuri naman ni Police Colonel Ronald Paloma, Provincial Director ng Iloilo Police Provincial Office ang mga Ilonggo Cops na nasa likod ng matagumpay na operasyon.
Patuloy naman na hinihikayat ng Iloilo PNP ang publiko na suportahan ang mas pinaigting na kampanya nito laban sa lahat ilegal na aktibidad at kriminalidad upang mapanatili ang kaayusan at kaunlaran sa lalawigan.
