Catanduanes – Tinatayang nasa Php105,000 halaga ng ilegal na droga ang nakumpiska sa isang lalaki na kabilang sa listahan ng Provincial Target Listed Personality sa inilunsad na buy-bust operation ng pinagsamang mga operatiba ng PDEA RO5 at Catanduanes PNP sa Barangay San Roque, Virac, Catanduanes nito lamang Abril 13, 2023.
Kinilala ni PCol Benjamin Balingbing Jr., Provincial Director ng Catanduanes Police Provincial Office, ang suspek na si Prince Joshua S. Gianan, 24, binata, walang trabaho at residente ng Barangay Danicop, Virac, Catanduanes.
Ayon kay PCol Balingbing Jr., bandang 11:53 ng tanghali ng isinagawa ang operasyon ng pinagsanib na mga operatiba ng PDEA Catanduanes Provincial Office, Regional Police Drug Enforcement Unit 5, Provincial Intelligence Unit, Catanduanes Police Provincial Office at Virac Municipal Police Station.
Nakumpiska mula sa suspek ang pitong piraso ng heat-sealed transparent plastic sachet ng hinihinalang shabu na may tinatayang timbang na 16 na gramo na nagkakahalaga ng Php105,000.
Mahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
Ang Catanduanes PNP katuwang ang PDEA RO5 ay patuloy sa paglulunsad ng mga operasyon upang matigil ang paglaganap ng ipinagbabawal na droga sa buong lalawigan nang mapanatiling ligtas ang bawat mamamayan sa kanilang nasasakupan.
