Cebu – Arestado ang tatlong buwang buntis na ginang sa Cebu matapos makumpiskahan ng tinatayang nasa 3.1 kilo ng shabu na nagkakahalaga ng Php21,080,000 sa buy-bust operation na inilunsad ng kapulisan sa Sitio Soong II, Barangay Mactan, Lapu-lapu City, Cebu noong Sabado, Abril 8, 2023.
Kinilala ng City Director ng Lapu-Lapu City Police Office (LCPO) Police Colonel Elmer Lim, ang naaresto na si “Lit-Lit”, 43, tubong Cagwait, Surigao Del Sur, na pansamantalang naninirahan sa Urban Deca Homes, Barangay Tipolo, Mandaue City, Cebu.
Bandang 3:45 ng hapon noong Sabado ng arestuhin ng mga operatiba ng City Drug Enforcement Unit at City Intelligence Unit ng LCPO, Regional Police Drug Enforcement Unit (RPDEU) 7, at NAVFORCEN 7 ang suspek.
Nahaharap ang suspek sa kasong paglabag sa Sec. 5 at 11, Art. II ng RA 9165 Comprehensive Dangerous Drugs Act of 2002.
Ayon sa PRO 7, ang matagumpay na operasyon ay bunga at patunay sa solido at walang humpay na pakiisa ng buong hanay ng kapulisan ng Central Visayas sa paglaban sa ilegal na droga alinsunod sa Programang Buhay ay Ingatan, Droga’y Ayawan (BIDA) ng Secretary of the Interior and Local Government.
