Cebu – Bunga ng pinalawak at pinaigting na intel driven operation ng kapulisan ng Central Visayas, napasakamay ng mga awtoridad ang tinaguriang Top 7 Regional Most Wanted Person sa kasong Murder noong Abril 7, 2023 sa Brgy. Lawis, San Remigio, Cebu.
Kinilala ni Police Lieutenant Colonel Jovit Culaway, Acting Regional Chief ng Criminal Investigation and Detection Group (CIDG) Regional Field Unit 7, ang akusado si ‘Nilo’, 35, residente ng nabanggit na barangay.
Dakong alas-10:10 ng umaga noong Biyernes ng arestuhin ang akusado ng mga tauhan ng CIDG Cebu Provincial Field Unit (PFU); 1st Provincial Mobile Force Company at Provincial Intelligence Unit ng Cebu Police Provincial Office (CPPO); Cebu City Mobile Force Company; at Regional Special Operation Group 7 sa bisa ng Warrant of Arrest.
Nabatid na ang naaresto ay ang pangunahing suspek sa pamamaril kay Police Staff Sergeant Jade Andales Carabuena noong ika-4 ng Disiyembre taong 2022 na naging sanhi ng kanyang agarang pagkamatay.
Kasalukuyang nakakulong ang akusado sa CIDG Cebu PFU, habang inihahanda na ang mga kaukulang dokumento kaugnay sa kaso nito para sa kanyang disposisyon.
Tiniyak ng buong hanay ng kapulisan ng Rehiyon 7 na kanila pang pagbubutihin ang kanilang mga hakbangin upang tugisin ang mga may pagkakasala sa batas.
