Trece Martires City — Arestado ang isang construction worker sa kasong panggagahasa at pagpatay sa isang Grade 1 pupil sa isinagawang manhunt operation ng Trece Martires PNP nito lamang Biyernes, Abril 7, 2023.
Kinilala ni Police Colonel Christopher Olazo, Provincial Director ng Cavite Police Provincial Office, ang suspek na si alyas “John”, 34, construction worker at ninong ng biktima na kinilala na si alyas “Nene”, 7 anyos, Grade 1 pupil at residente ng Brgy. Cabuco, Trece Martires, Cavite.
Ayon sa inisyal na ulat, nakipag-inuman ang suspek sa ama ng biktima noong Huwebes Santo, at napag-alamang sumama ang biktima sa suspek dahil gustong maligo sa ilog.
Dakong 5:00 ng hapon, nakatanggap ng tawag ang himpilan ng pulisya ukol sa isang batang natagpuan na walang saplot, may mga galos sa katawan at pinaghinalaang ginahasa.
Agad naman pinuntahan ng pulisya sa pamumuno ni Police Lieutenant Colonel Jonathan Asnan, Chief of Police ng Trece Martires Police Station at isinugod sa pinakamalapit na ospital ang bata ngunit idineklarang dead-on-arrival.
Naaresto ang suspek sa isang construction site sa Brgy. San Agustin, Langkaan Road, Dasmariñas, Cavite sa tulong ng mga CCTV footage at ilang report mula sa mga concerned citizens.
Pinuri naman ni PCol Olazo ang Trece Martires PNP sa alertong pagtugon sa krimen at sinisigurado na mas paiigtingin ng Trece Martires PNP ang kampanya laban sa pang-aabuso sa mga kababaihan at kabataan.
Source: Trece Martires Pulis
Panulat ni PSSg Donabel Dulin
