Navotas City — Timbog ang isang lalaking tulak ng ilegal na droga sa isinagawang buy-bust ng Navotas City Police Station nito lamang Biyernes, Marso 31, 2023.
Kinilala ni Police Colonel Allan Umipig, Chief of Police ng Navotas CPS, ang suspek na si alyas “Lance”, 40, at naninirahan sa Banawe, Quezon City.
Ayon kay PCol Umipig, naaresto si alyas “Lance” sa Governor Pascual St., Brgy. San Jose, Navotas bandang 10:49 ng gabi ng mga operatiba ng Station Drug Enforcement Unit ng nasabing istasyon.
Nakumpisa sa kanya ang apat na sachets ng hinihinalang shabu na may kabuuang timbang na 52.11 gramo at nagkakahalaga ng Php354,348.
Himas rehas ngayon ang nasabing suspek at nahaharap sa kasong paglabag ng RA 9165 o Comprehensive Dangerous Drugs Act of 2002.
Tiniyak ni PCol Umipig, na patuloy na gagampanan ng kanyang mga tauhan ang pagsugpo sa talamak na bentahan ng ilegal na droga sa lugar lalo na sa mga indibidwal na mula pa sa ibang mga lungsod na dumadayo sa kanilang lugar para manatiling ligtas ang kanilang nasasakupan.
Source: Navotas City Police Station
Panulat ni PSSg Remelin M Gargantos
