Baguio City – Tinatayang Php4 na bilyong halaga ng shabu ang nakumpiska sa isang Chinese National sa inihaing Search Warrant ng PNP, PDEA at NBI sa Purok 4, Brgy. Irisan, Baguio City, nito lamang ika-29 ng Marso 2023.
Kinilala ni Police Brigadier General David Peredo, PRO COR Regional Director, ang suspek na si Ming Hui alyas “Tan”, Chinese National, 51, at kasalukuyang naninirahan sa nasabing lugar.
Ayon kay PBGen Peredo, naging matagumpay ang operasyon sa pinagsanib na pwersa ng Police Regional Office Cordillera (PRO COR), National Capital Region Police Office (NCRPO), PNP Drug Enforcement Group (PDEG), Philippine Drug Enforcement Agency (PDEA), at ng National Bureau of Investigation.
Nakumpiska ng mga operatiba mula sa suspek ang humigit kumulang 575 kilo ng shabu na nagkakahalaga ng Php4 bilyon sa kanyang inuupahang bahay sa Brgy. Irisan, Baguio City.
Samantala, nasaksihan naman nina Secretary Benjamin Abalos Jr. ng Department of Interior and Local Government (DILG), kasama ang The Deputy Chief PNP for Operations (TDCO), PMGen Jonnel Estomo; Regional Director ng NCRPO, PMGen Edgar Okubo; Hon. Mayor Benjamin Magalong , Baguio City Mayor; PDEA Director General Moro Virgilio Lazo; Deputy Regional Director for Operations (DRDO) ng NCRPO PBGen Jack Wanky; District Director ng Northern Police District, PBGen Ponce Rogelio Peñones Jr.; at PRO COR Regional Director, PBGen David Peredo, Jr., ang pag-iimbentaryo sa mga nakumpiskang shabu.
Mahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
Patuloy ang Cordillera PNP sa pagpapanatili ng kaayusan at pagpapaigting ng kampanya laban sa ilegal na droga upang makamit ang katahimikan at kapayapaan sa buong nasasakupan.
Source: PROCOR PIO
Panulat ni Pat Raffin Jude Suaya
