Iloilo City – Nasa Php8.16 milyong halaga ng shabu ang nasabat sa dalawang suspek kabilang ang isang senior citizen sa isinagawang buy-bust operation ng PNP at PDEA sa Zone 6, Barangay Buhang, Jaro, Iloilo City, nito lamang ika-27 ng Marso 2023.
Kinilala ni Police Major Rommel Anicete, Acting Chief ng RPDEU 6, ang mga nahuling suspek na si alyas “Madam Ester”, 68, residente ng Novaliches, Quezon City, isang High Value Individual at tinuturing na Regional Priority Target at ang kasama nitong si alyas “JR”, walang asawa at residente ng Brgy. Ungka, Jaro, Iloilo City.
Ayon kay Police Major Anicete, ikinasa ang operasyon bandang alas 2:00 ng hapon nitong Lunes ng mga operatiba ng Regional Police Drug Enforcement Unit 6 kasama ang Iloilo City Police Office – Police Station 3 sa pakikipagtulungan sa PDEA 6.
Ayon pa kay Police Major Anicete, nahuli ang mga suspek matapos ang pagbebenta ng isang malaking pakete ng hinihinalang shabu sa isang poseur buyer kapalit ng halagang Php72,000.
Narekober sa dalawa ang 11 knot tied transparent plastic sachet ng pinaghihinalaang shabu na may kabuuang timbang na 1,200 gramo at nagkakahalaga ng Php8,160,000, dalawang keypad na cellphone, isang unit ng 125 Euro Motorcycle at iba pang non-drug items.
Ang mga suspek ay sasampahan ng kasong paglabag sa R.A. 9165 o ang Comprehensive Dangerous Drugs Act of 2002.
Patuloy ang buong hanay ng PRO6 sa pagpapaigting nito sa kampanya laban sa ilegal na droga para sa pag-unlad at pagkamit ng isang maayos, ligtas at mapayapang pamayanan.
