Cebu – Nasabat ng mga operatiba ng Talisay City PNP ang nasa mahigit Php2.75 milyong halaga ng shabu mula sa isang High Value Individual (HIV) na suspek sa isinagawang buy-bust operation sa Zone 4 Butoy, Brgy. Biasong, Talisay City, Cebu noong Linggo, Marso 26, 2023.
Kinilala ni Police Lieutenant Colonel Randy Caballes, Chief of Police ng Talisay City Police Station, ang suspek na si alyas “Tolits”, 26, residente ng nabanggit na barangay.
Ayon kay PLtCol Caballes, bandang 11:30 ng umaga ikinasa ng mga operatiba ng Drug Enforcement Unit ng Talisay City PNP ang operasyon na humantong sa pagkakaaresto ng suspek at pagkakasamsam ng nasa 405 gramo ng hinihinalang shabu na may tinatayang halaga na Php2,754,000.
Nakuha rin sa suspek ang isang black sling bag at green tea bag na ginamit bilang lagayan ng mga ilegal na droga at buy-bust money.
Kasong paglabag sa RA 9165 o ang Comprehensive Dangerous Drugs Act of 2002 ang kakaharapin ng suspek.
Siniguro naman ng buong hanay ng Talisay City Police Station na kanila pang pagbubutihin ang kampanya kontra ilegal na droga para sa pag-unlad at pagkamit ng isang maayos, ligtas at mapayapa na pamayanan.
