Cebu City – Personal na iginawad ni Police Major General Ronaldo Olay, Director for Logistics, ang mga baril at iba pang mga kagamitan sa mga pamunuan ng Police Regional Office 7 sa Blessing and Ceremonial Turnover of Equipment na ginanap sa Camp Sergio Osmeña Sr., Cebu City, nito lamang Martes, Marso 21, 2023.
Kabilang sa mga turn-over na gamit ay mga caliber 5.56 ACE 22N basic assault rifles Galil, magazine assembly for caliber 5.56, 9mm Rex Delta pistols, 5.56 Negev light machine guns, isang yunit ng Toyota Hilux 4×4, Kevlar vests, at mga bala.
Ang mga naturang kagamitan ay ipapamahagi sa mga himpilan ng kapulisan sa iba’t ibang lungsod at probinsya ng Central Visayas.
Sa naging mensahe ni Police Major General Olay, tiniyak nito ang kalidad ng mga biniling kagamitan na aniya isinailalim pa sa endurance field testing at evaluation.
“I would like to proudly tell you that these are the product of our national headquarters bids and awards committee procurement. At yung mga baril na ito alam ba ninyo na bago natin tinanggap, these firearms underwent field testing and evaluation…ibig sabihin bago namin tanggapin ay dumaan ng 20,000 rounds continuous firing, ibig sabihin matibay siya,” saad ng opisyal.
Muli naman nitong hinimok ang mga kapulisan na makakatanggap ng mga gamit na pakaingatan at alagaan ang mga ito.
Bilang bahagi ng programa, ginawaran at binigyang kilala ang mga personalidad na naging bahagi sa masusing pagsasakatuparan ng One-Time Cleansing of PNP Property, Plant, and Equipment’s Account Balances sa rehiyon.
