Leyte – Napatay ang isang lalaking Top 2 Regional Drug Priority Target sa isinagawang buy-bust operation ng mga tauhan ng Police Regional Office 8 at PDEA 8 sa Brgy. Poblacion, Merida, Leyte nitong Martes, Marso 21, 2023.
Kinilala ni Police Colonel Reydante Ariza, Hepe ng Regional Intelligence Division, PRO 8, ang napatay na si alyas “Rod”, residente ng Ormoc City, kabilang sa High Value Target at Top 2 sa Regional Top 10 Priority Target ng PNP at PDEA 8.
Napatay ang suspek bandang 4:40 ng hapon nang isagawa ang operasyon ng mga operatiba ng Regional Police Drug Enforcement Unit 8 sa pangunguna ni Police Major J-Rale Oaalisbo, kasama ang Merida Municipal Police Station sa pamumuno ni Police Major Ian Salvador Po, Chief of Police at sa koordinasyon ng Philippine Drug Enforcement Agency – Regional Office 8.
Ayon kay PCol Ariza, nakabili ang isang poseur buyer sa suspek ng pinaghihinalaang shabu kapalit ng Php30,000, dito na idineklara ng mga operatiba ang pag-aresto ngunit binunot ng suspek ang kanyang baril subalit naunahan ito ng mga pulis at nabaril ito sa iba’t ibang bahagi ng kanyang katawan.
Agad namang isinugod sa Ormoc District Hospital ang suspek ngunit idineklara na itong dead-on-arrival.
Nanawagan naman ang PNP-PDEA 8 sa komunidad na makipagtulungan sa mga otoridad at isuplong ang sinumang nagtutulak ng droga sa bawat barangay na kanilang sakop para makamit ang kapayapaan at kaayusan tungo sa kaunlaran ng buong rehiyon.
