Davao City – Tinatayang aabot sa Php801,950 halaga ng hinihinalang shabu ang nasabat sa isinagawang buy-bust operation sa Cabaguio Avenue, Davao City nito lamang Marso 20, 2023.
Kinilala ni Police Major Antonio Luy, Acting Station Commander ng Bajada Police Station, ang suspek na si alyas “Ate”, 48, residente ng Boulevard St., Isla Verde, 23-C, Davao City na tinaguriang Top 1 High Value Individual sa City Level.
Ayon kay PMaj Luy, naaresto ang suspek matapos mahuli sa akto ng pagbebenta ng ilegal na droga sa nagpanggap na poseur buyer na mga tauhan ng Bajada Police Station.
Nakuha mula sa suspek ang ilang pakete ng hinihinalang shabu na may bigat na humigit kumulang 50.12 gramo na may street market value na Php801,950 at marked money na ginamit sa operasyon.
Mahaharap sa kasong paglabag sa Republic Act 9165 o Comprehensive Dangerous Drugs Act of 2002 ang nasabing suspek.
Ang laban kontra ilegal na droga ay ipinagpatuloy na isinasagawa sa pamumuno ni Police Brigadier General Alden Delvo, Regional Director ng Police Regional Office 11 upang makamit ang layunin na gawing drug-free ang rehiyon onse.
Panulat ni Patrolman Alfred Vergara/RPCADU11
