Valenzuela City – Timbog ang isang lalaki dahil sa pagbibitbit ng baril na walang dokumento ng mga operatiba ng Valenzuela City Police Station nito lamang Sabado, Marso 18, 2023.
Kinilala ni Police Colonel Salvador Destura Jr, Officer-In-Charge ng Valenzuela CPS, ang suspek sa pangalang Mark Anthony, 35, at kasalukuyang naninirahan sa No. 82 Mabolo Street, Santolan sa Malabon City.
Ayon kay PCol Destura, Jr., habang nagpapatrolya ang mga tauhan ng Malinta Sub Station (SS4) ng nasabing istasyon bandang 2:15 ng madaling araw, ang suspek ay sakay ng kanyang BMX na bisikleta at dali-daling nag U-turn pagkakita sa mga patrolling officer na dahilan upang mahulog niya ang isang asul na pouch bag, na tumawag sa atensyon ng mga otoridad para kunin ang nasabing bagay. Doon ay may nakita silang isang baril na nakalabas sa pouch bag habang nakakalat ang tatlong (3) bala sa semento.
Nang tanungin hinggil sa legalidad ng pagmamay-ari ng nasabing baril, nabigo siyang magpakita ng anumang mga dokumento. Kaya naman, agarang hinuli ang suspek sa harap ng House No. 1305 Maple Street, Barangay Malinta,
Valenzuela City.
Nasabat sa suspek ang isang unit ng Pistol 9mm caliber na walang serial number; grip panel; tatlong live ammunitions na 9mm; isang asul na pouch bag; at isang asul na bisikleta.
Samantala, paglabag sa RA 10591 o Comprehensive Law on Firearms and Ammunition Regulations Act ang kanyang kahaharapin.
Tiniyak naman ni PCol Destura na patuloy ang Valenzuela CPS sa kampanya laban sa lahat ng uri ng kriminalidad at ilegal na droga sa kanilang nasasakupan upang mapanatili ang kaayusan, kapayapaan at kaligtasan ng bawat indibidwal sa naturang lungsod.
Source: NPD PIO
Panulat ni PSSg Remelin M Gargantos
