Cebu City – Makalipas ang halos higit isang dekada na pagtatago sa batas, napasakamay ng mga awtoridad ang tinaguriang Top 2 at 3 Most Wanted Person (MWP) ng Cebu sa kasong Murder noong Marso 13, 2023.
Ayon kay Police Lieutenant Colonel Maria Theresa T Macatangay, Chief IDMU, dakong alas-11:35 ng umaga noong Lunes, naaresto ng mga operatiba ang Top 2 MWP na kinilalang si “Elias”, 66, sa N. Bacalso Avenue, Brgy. Sambag I, Cebu City.
Habang ang Top 3 MWP na kinilalang si “Benedicto”, 48 ay naaresto dakong alas-2:15 ng hapon sa Purok Bayabas, Brgy. Lamac, Pinamungajan, Cebu.
Ang mga akusado ay kapwa inaresto sa bisa ng warrant of arrest sa inilunsad na manhunt operation ng mga tauhan ng Investigation and Detective Management Unit (IDMU) at Criminal Investigation and Detection Group (CIDG) ng Cebu City Police Office (CCPO) para sa kasong Murder.
Pinuri naman ng City Director ng CCPO, Police Colonel Ireneo Dalogdog ang mga operatiba sa likod ng matagumpay na operasyon. Kasunod nito ay tiniyak ng grupo na hindi sila titigil sa pagpapatupad ng kanilang hakbangin upang matunton at madakip ang mga personalidad na may pagkakasala at pananagutan sa batas.
