Occidental Mindoro – Arestado ang isang High Value Individual sa isinagawang buy-bust operation ng mga awtoridad sa Brgy. Tangkalan, Mamburao, Occidental Mindoro noong ika-12 ng Marso 2023.
Kinilala ni Police Colonel Jun Dexter Danao, Provincial Director ng Occidental Mindoro, ang suspek na si alyas “Ryan”, residente ng Mamburao, Occidental Mindoro.
Ayon kay PCol Danao, naaresto ang suspek sa isinagawang buy-bust operation ng mga tauhan ng Regional Police Drug Enforcement Unit (RPDEU) kasama ang Municipal Drug Enforcement Unit ng Mamburao Municipal Police Station, Provincial Drug Enforcement Unit ng Occidental Mindoro Police Provincial Office at PDEA Occidental matapos itong mabilhan ng hinihinalang ilegal na droga kapalit ng Php1,000.
Narekober rin mula sa suspek ang pera na ginamit bilang buy-bust money, isang cellphone, at dalawa pang plastic sachet ng hinihinalang shabu na may timbang na humigit kumulang 0.41 gramo.
Samantala, nahaharap naman ang suspek sa kasong paglabag sa Section 5 at Section 11 ng RA 9165 o kilala bilang “Comprehensive Dangerous Drugs Act of 2002.”
Ang pagpapaigting ng kampanya laban sa ilegal na droga sa lalawigan ng Occidental Mindoro ay isa lamang sa direktiba ni PCol Danao upang patuloy na magkaroon ng kaayusan at kapayapaan ng kanilang nasasakupan.
Panulat ni Patrolman Erwin Calaus
