Pormal na inilunsad ng Pambansang Pulisya ang PNP Digital Booking System kasabay sa pagdaraos ng tradisyonal na Monday Flag Raising Ceremony na ginanap nito lamang umaga sa PNP National Headquarters sa Camp Crame, Quezon City.
Ang naturang paglulunsad ay pinangunahan mismo ni PNP Chief Police General Rodolfo S. Azurin, Jr kasama ang iba pang matataas na lider ng himpilan na dinaluhan naman ni Secretary Jesus Crispin Remulla, Secretary, Department of Justice, ang siyang panauhing pandangal ng nasabing kaganapan.
Layunin ng PNP Digital Booking System na mas mapaganda pa ang pagbibigay ng iba’t ibang serbisyo ng himpilan para sa pagpapanatili ng kapayapaan at kaayusan sa buong bansa partikular na sa larangan ng pag-iimbestiga at pagkalap ng mga mahahalagang impormasyon.
Sa pamamagitan nito, mas makapaghatid pa ang PNP ng agarang, de- kalidad at malawakang serbisyo saan mang sulok ng bansa sa tulong ng mga panibagong teknolohiya at modernong kagamitan.
Kasabay din sa selebrasyon ang Signing ng Memorandum of Agreement sa pagitan ng PNP at ng SM at City Mall.
Nakasaad sa MOA ang pagtatalaga ng Pambansang Pulisya ng mga PNP Help Desk para sa National Police Clearance System sa lahat ng SM at City Mall sa buong bansa upang mas mapabilis ang paghahatid ng mga pangunahing serbisyo sa lahat ng mamamayang Pilipino.
Samantala, pinuri naman ni Secretary Remulla ang himpilan sa matagumpay nitong paglulunsad ng ebooking system at hinikayat ang hanay na mas pagbutihin pa ang pagpapatupad ng batas bilang kaagapay sa pagkamit ng maayos at mapagkakatiwalaang justice system sa bansa sa pamamagitan ng pakikinig ng boses ng taong bayan.
Aniya, “Mga kasamahan ko sa pulisya, pakinggan natin ang boses ng ating mga kababayan. Sila lang ang makapagsabi kung sinusunod natin ang ating mandato. Let us earn their respect, and trust and confidence. The police (PNP) and the Department of Justice must work together for a better criminal justice system for the Filipino people.”
