Pasay City – Arestado ng mga operatiba ang isang babae dahil sa naharang na parcel nito galing sa Pakistan sa NAIA Complex, Pasay city nitong lamang Marso 11, 2023.
Ang operasyon ay isinagawa ng mga operatiba ng PNP Aviation Security Group, PDEA, at iba pang miyembro ng NAIA-IADITG.
Ayon kay Police Colonel Rhoderick Campo, Chief, AVSEU NCR, ang parcel ay naglalaman ng apat (4) na winter jacket na naglalaman ng humigit kumulang 11,756 gramo ng white crystalline substance ng hinihinalang Methamphetamine Hydrochloride na kilala rin bilang shabu na may street value na Php79,940,800, isang (1) mobile phone, at dalawang (2) ID, na nakuhanan ng larawan at maayos na naimbentaryo ng PDEA.
Ang mga ebidensya ay isinumite sa PDEA Laboratory Service, habang ang naarestong suspek ay dinala sa NAIA-IADITG Operations Center para sa dokumentasyon at mahaharap sa kasong paglabag sa RA 9165 o Comprehensive Dangerous Drugs Act of 2002.
Pinuri naman ni PBGen Anthony Aberin, Director ng PNP Aviation Security Group, ang matagumpay na multi-million drug operation ng AVSEU NCR at NAIA- IADITG na isang solidong patunay sa mas pinaigting na seguridad at mas pinalakas na pwersa ng mga kapulisan sa bawat paliparan upang matiyak ang kaligtasan ng bawat pasaherong umaalis at dumadating.
