Iloilo – Timbog ang isang babaeng high value drug personality at Php510,000 naman ang nakumpiska sa buy-bust operation ang PNP sa Brgy. Cabugao Sur, Pavia, Iloilo bandang 5:40 ng hapon nitong Sabado, ika-11 ng Marso 2023.
Kinilala ni Police Major Rolando Araño, Hepe ng Pavia MPS, ang arestado na si Sheila Marie Nueva y Tellain, 40, housewife at residente ng nabanggit na barangay.
Ang naturang buy-bust operation ay inilunsad ng pinagsamang pwersa ng mga operatiba ng Provincial Drug Enforcement Unit ng Iloilo Provincial Police Office at Station Drug Enforcement Team ng Pavia Municipal Police Station.
Naaresto ang naturang suspek matapos itong magbenta sa isang poseur buyer ng pinaghihinalaang shabu kapalit sa halagang Php20,000.
Nakuha din sa drug suspek ang may kabuuang 75 gramo ng suspected shabu na may tinatayang halaga na Php510,000.
Mahaharap ang supek sa kasong paglabag sa RA 9165 o ang Comprehensive Dangerous Drugs Act of 2002.
Ang Iloilo PNP sa ilalim ng pamumuno ni Police Colonel Ronald Palomo ay hindi titigil sa pagpapaigting ng kampanya kontra ilegal na droga at sa lahat ng uri ng kriminalidad upang mapanatili ang kaayusan sa probinsya ng Iloilo.
