Negros Oriental – Tinatayang nasa 4000 piraso ng halamang mangrove ang matagumpay na naitanim ng mga kawani ng ilang ahensya ng pamahalaan na nakiisa sa inilunsad na Mangrove Tree Planting sa tatlong costal barangay ng Guihulngan City, Negros Oriental, noong Marso 11, 2023.
Kasama sa mga barangay na naging bahagi ng aktibidad ay ang Barangay Mckinley, Brgy. P. Zamora at Brgy. Tinayunan.
Ayon kay Acting Chief of Police ng Guihulngan City Police Station, Police Lieutenant Colonel Romeo Cubo, ang programa ay inorganisa at inisiyatibo ng City Agriculturist Office ng Guihulngan na masugid na sinuportahan at nilahukan ng mga tauhan ng naturang istasyon at ng mga miyembro ng 61st Special Action Company Special Action Force, 32nd CMO Philippine Army, CAA II Delta Company Philippine Coastguard maging ng City Environment and Natural Resources Officer (CENRO), Youth For Peace Movement – Guihulngan City Chapter, Force Multipliers, Advocacy Support Group at mga pamunuan ng nabanggit na barangay.
Ang pagsasakatuparan ng aktibidad ay bahagi ng mga nakatakdang gawain ng grupo kasunod ng pagdiriwang ng National Women’s Month at bilang pakikiisa sa pagsusulong ng kaayusan at kagandahan ng kalikasan.
