Cebu City – Nahaharap sa patung-patong na kaso ang 39 taong gulang na lalaking nadakip sa buy-bust operation na inilunsad ng mga operatiba ng Police Station 10, Cebu City Police Office (CCPO) noong Linggo, Pebrero 26, 2023.
Kinilala ni Police Major Janelito Marquez, Station Commander, ang naaresto na si alyas “Ete”, na residente ng nabanggit na barangay.
Ayon kay Police Major Marquez, dakong alas-6 ng hapon nang maaresto ng mga miyembro ng Station Drug Enforcement Unit (SDEU) ng istasyon ang suspek sa Kadasig Phase II, Brgy. Tisa, Cebu City.
Nasabat mula sa suspek ang nasa 25 gramo ng shabu na nagkakahalaga ng nasa Php170,000 at ang isang unit ng calibre 45 pistol na naglalaman ng tatlong bala.
Kasong paglabag sa Sec. 5 at 11, Art. II ng RA 9165 (Comprehensive Dangerous Drugs Act of 2002) at RA 10591 (Comprehensive Firearms and Ammunition Regulation Act) ang suspek.
Patuloy naman ang isinasagawang pagpapaigting ng mga kawani ng PS 10 sa mga hakbangin nito upang masiguro at mapanatili ang kaayusan at kapayapaan ng komunidad.
