Sultan Kudarat — Kalaboso ang isang lalaki matapos mahulihan ng baril habang nasa loob ng isang KTV Bar sa Brgy. Dansuli, Isulan, Sultan Kudarat nito lamang ika-25 ng Pebrero 2023.
Kinilala ni Police Lieutenant Colonel Gary Flor Marfil, Hepe ng Isulan Municipal Police Station, ang naarestong suspek na si alyas “Abdulrahim”, 35, may asawa at residente ng Datu Abdullah Sangki, Maguindanao.
Inaresto si “Abdulrahim” matapos makuhanan ng mga ilegal na armas sa isinagawang Oplan Bakal Operation ng mga tauhan ng Isulan Municipal Police Station.
Ayon kay PLtCol Marfil, nakumpiska sa suspek ang isang kalibre 45 na baril na may serial number na 123571 na may kasamang dalawang magazine at bala.
Nabigo ang suspek na magpakita ng mga kaukulang dokumento sa dala nitong baril kaya agad itong inaresto ng mga awtoridad.
Mahaharap ang suspek sa kasong paglabag sa RA 10591 o Illegal Possession of Firearms and Ammunition.
Alinsunod sa Peace and Security Framework ni CPNP na M+K+K=K sa Kaayusan Program, tiniyak naman ni PLtCol Marfil na patuloy ang kanilang hanay sa pagsasagawa ng mga operasyon upang masiguro ang kaligtasan ng bawat mamamayan.
Source: Isulan Municipal Police Station
Panulat ni Patrolman Khnerwin Jay Medelin/RPCADU12
