Cebu City – Arestado ang 23-taong gulang na lalake at nasabat mula dito ang nasa Php680,000 na halaga ng shabu sa anti-drug bust ng mga operatiba ng Cebu City PNP sa Sitio Silangan I, Brgy. Tinago, Cebu City, noong Huwebes, Pebrero 23, 2023.
Ayon kay Police Lieutenant Colonel Henrix Bancoleta, Chief City Intelligence Unit ng CCPO, ang suspek na kinilalang si alyas “Bugsok”, residente ng nabanggit na barangay ay nadakip dakong alas-6:30 ng gabi matapos makumpiska mula rito ang nasa 100 gramo ng hinihinalang shabu na may halaga na Php680,000.
Ang suspek ay nasakote ng mga
operatiba ng City Intelligence Unit (CIU) at Police Station (PS) 3, Cebu City Police Office (CCPO).
Kumpiskado rin mula sa suspek ang buy-bust money na ginamit sa operasyon at ang isang (1) pouch na ginamit bilang lagayan ng mga ilegal na droga.
Bunsod ng naturang operasyon, si “Bugsok” ay napaloob sa talaan ng High Value Individual sa lungsod.
Mahaharap ang suspek sa kasong paglabag sa Sec. 5 at 11, Art. II ng RA 9165.
Siniguro naman ng buong sangay ng kapulisan sa lungsod ang patuloy na pagpapaigting sa kampanya kontra ilegal na droga at maging sa lahat ng uri ng kriminalidad para sa kaayusan at kapayapaan ng mamamayan.
