Cebu City – Lantaran ang ginawang pagsira ng mga miyembro ng Philippine Drug Enforcement Agency Regional Office VII at Police Regional Office 7 sa may kabuuang 28 kilo na ilegal na droga na nagkakahalaga ng nasa mahigit Php191 milyon sa pamamagitan ng thermal decomposition sa Cosmopolitan Funeral Homes, Inc., sa kahabaan ng Junquera Street, Cebu City, noong Sabado, Pebrero 18, 2023.
Base sa pahayag ng PRO 7, sakop ng utos ng korte para sa pagsira ang nasa 28,094.627 gramo ng methamphetamine hydrochloride, karaniwang kilala sa tawag na “shabu” at 163.4984 gramo ng pinatuyong marijuana na nagkakahalaga ng Php191,063,083.
Ayon naman kay Police Brigadier General Jerry Bearis, Regional Director ng PRO 7, “Ang pagsira sa mga nakumpiskang ilegal na droga ay bahagi ng prosesong ipinag-uutos ng batas sa ilalim ng pangangasiwa ng Korte”.
Kasunod nito, iniugnay ng Direktor na ang tagumpay na pagkasira ng mga nasamsam na ilegal na droga ay bunsod ng aktibong pakikipagtulungan ng komunidad.
