Iloilo City – Mahigit sa Php1 milyong halaga ng droga ang nasabat sa inilunsad na buy-bust operation ng mga operatiba ng Iloilo City Police Office-City Drug Enforcement Unit at ng Jaro PNP sa Brgy. Lanit Jaro, Iloilo City madaling araw nitong ika-18 ng Pebrero 2023.
Kinilala ni Police Colonel Joeresty Coronica, Acting Chief ng Iloilo City Police Office, ang nahuli na si Praud Joan Animas, 43, naitala sa drugs watchlist ng kapulisan bilang High Value Individual at residente ng nabanggit na lugar.
Nakuha sa kanyang posesyon ang may kabuuang 150 gramo ng suspected shabu na nagkakahalaga ng Php1,020,000, kabilang ang ginamit na buy-bust money at mga ibang drug paraphernalia.
Ang naarestong suspek ay mahaharap sa kasong paglabag sa RA 9165 o Comprehensive Dangerous Drugs Act of 2002.
Ang Iloilo City PNP sa ilalim ng pamumuno ni PCol Joeresty Coronica ay hindi titigil sa mga ganitong operasyon at mas papaigtingin pa ang kampanya kontra ilegal na droga at sa lahat ng uri ng kriminalidad upang mapatili ang kaayusan sa syudad ng Iloilo.
